Assimi takuneqarsinnaasut saamimmit ukuupput: ilinniartoq Nick Bæk Heilmann (ilinniagarivaa nunanut allanut tunngasumik politikki, CBS), ilinniartoq Gerth P. Olsen (ilinniagarivaa aningaasaqarnikkut pilerisaarinermut suliniuteqarneq, CBS), siunnersorti Lotte Brøns Symes, Folketingimi ilaasortaq Sara Olsvig aammalu ilinniartoq Anne-Kathrine Brandt Olsen (ilinniagarivaa naalagaaffiit pissusiinik ilisimatusarneq, K.U.)
IA Folketingimi
2011-imi qinersineq sioqqullugu Inuit Ataqatigiit Folketingimi
2001-imi Folketing-imut qinersisoqarneranili 2011-mi qinersinerup tungaanut IA Folketing-imi Atlantikup Avannaani Suleqatigiinni suleqataalluarsimavoq. Siullermik ilaasortat pingasut kingornalu Atlantikup Avanna sinnerlugu ilaasortaatitanit marluk qanimut suleqatigiinnikkut kattullutillu allaffeqarfeqatigiinnikkut suliassat nunatsinnut Savalimmiunullu pingaaruteqartut pimoorunnerunissaat anguniarsimavaat. 2001-imi qinersisoqarnerata kingorna Atlantikup Avannaani Suleqatigiit pilersinneqarnissaannut suliniuteqartut ilagaat maannakkut nunatsinni Naalakkersuisuni siulittaasoq Kuupik Kleist. Qinigaaffiit marluk ingerlareernerisigut 2007-imi qinersisoqarmat Kuupik qinigassanngortinniarani aalajangerpoq. Taamani qularisassaangitsumik qinerneqarnerpaalluni isertumit Juliane Henningsen-imit, taamani 25-inik ukioqartumit, taarserneqarpoq. 2011-imi Folketing-imut qinersinissap nalunaarutigineqannginnerani Juliane qinigassanngortinniarnani aalajangernini nalunaarutigivaa. Nunatsinni Inatsisartuni sulinissaq ilinniagaqarnissarlu pingaarnerutinneqarput.
15. september 2011 Folketingimut qinersineq
15. september 2011 Folketing-imut qinersisoqarmat Inuit Ataqatigiit (IA) nutaamik ilaasortanngortitsivoq, taamatullu nunatsiniit danskit inatsisartuinut kingumut aallartitaqaqqilersinnaalluni. Taasinernik 8.129-inik tunuliaqutaqarluni Sara Olsvig, 32-inik ukioqartoq, siullermeerluni qinigaavoq. Taamaalilluni IA tulleriiaaginnarmik pingajussaa qinersinermi taaneqarnerpaamik ilaasortaatitaqalerpoq, nunattalu Folketing-imi sulinermi sinniisussaanik nukittuumik issiatitaqalerluni.
Inuit Ataqatigiit 2011-mi qinersinerup kingorna
2011-mi Folketing-imut qinersinermi ajugaanermi kingorna tunuliaqutaqarlualerluni Christiansborg-imi allaffinni Ridebanefløj-imik taaneqartartumi allaffeqarfeerannguamik pilersitsivoq, tassanngaanniillu suliassat ingerlanneqalerlutik. Qinersinerup kingorna Atlantikup Avannaani Suleqatigiit ingerlanneqarsinnaasimanngillat, maannakkullu atorunaarsinneqarlutik. Tassunga ilaatigut patsisaavoq IA-p ukiuni qulini kingullerni qanimut suleqatigisimasaa, savalimmiormiut partiiat Tjodveldi sinnerlugu ilaasortaasimasoq Høgni Hoydal qinigaanngimmat. Qinikkat sisamat Atlantikup Avannaaneersut danskit inatsisartuini ullumikkut aaqqissugaasumik suleqatigiiffeqarunnaarput.
Partiit qinikkallu suleqatigiit akornanni suleqateqarnerit
Qinigaaffiit arlallit ingerlanerini SF aamma Enhedslisten Inuit Ataqatigiinnit suleqatigineqarsimapput, partiillu taakku IA-p naalakkersuinikkut eqqarsartaasianut qaninnerpaatut inissisimallutik. 2011-mi qinersinerup kingorna SF teknikkikkut suleqatigineqalerpoq, taamatullu Enhedslisten suli suleqatiginqarluni. Danskit partiivinut pituttorsimannginnissaq IA-mit pingaartinneqarpoq, taamatullu Folketing-imi taasinerni suliaqarnermilu nammineq ingerlatsisinnaaneq pingaartinneqarluni. Partiit qinikkallu akornanni suleqatigiit pituttorfiginagit suliassat nunatsinnut tunngasut pineqartillugit suleqatigiinnissaaq IA-mit pingaartinneqarluinnarpoq. Anguniagaq tassaavoq Folketing-imi partiit tamaasa ammasumik inussiarnersumillu oqaloqatigineqartarnissaat.
